上兩星期我去咗旺角康得思酒店嘅明閣，參加咗個純素點心班，用依家最興嘅植物肉去包點心。一班十人，分三檯包點心，酒店有預備濕紙巾、酒精搓手液。
師傅當日已經準備好晒點心嘅皮同內餡，我地唔洗搓皮同撈餡，其實做點心最難都係包嗰一下！
當日學咗四款點心，燒賣、蒸餃、叉燒包同埋鍋貼，一開始包燒賣都ok，係四款中最易包嘅一款，都仲handle到；但到野菌蒸餃，包到個頂好似朵花咁，真係有啲「拿手唔成勢」嘅感覺，不過都仲叫做勉強過到關；去到包鍋貼，真係完全證實我係手指唔協調，摺極都摺唔得靚，好失敗；到最後做叉燒包，要包到啲餡唔響個頂穿出嚟，真係好難呀，最後我只係勉勉強強質埋啲餡落個皮就當過關。😝
當日啲點心職員幫我地拎去蒸晒，我地可以選擇即場食或包走。我選擇咗食一半包一半，用OmniPork新豬肉加埋Heura植物雞包嘅燒賣，完全係零破綻地食唔出係素；野菌餃勁好口感，好爽口；鍋貼用咗Beyond Beef未來牛肉做餡，皮好煙韌，內餡夠Juicy；梅菜新豬肉叉燒包，又一次有「你唔講我都唔覺得食緊齋」嘅感覺！
呢次點心班真係好好玩，但又再一次證明我真係無包點心嘅天份😭，我一路包一路響度話：我都係返去煮吓餸好喇。點心呢啲野，都係出街食把啦！🤣
不過呢，呢度好似周末都有不同嘅Cooking Class，大家有興趣不妨可以去試下。今次因為酒店配合地球月，所以$422就上到呢一堂，仲要有幾百蚊coupon拎得返，都好抵呀！
立即Follow我的Instagram @mrswongskitchen
#自費活動
Search